Nod y gweithdy hwn yw cynllunio eich blodau eich hun gan ddefnyddio iaith raglennu wedi'i seilio ar flociau.
Cynlluniwyd y gweithdy hwn i gynnig her i bob oed sy'n dymuno dysgu mwy am raglennu.
I'ch helpu i gyrraedd y nod hwn, byddwn yn edrych ar fathemateg a chodio sy'n angenrheidiol ar gyfer tynnu llun gwahanol siapiau, gan ddatblygu'r wybodaeth fydd ei hangen ar gyfer creu petalau.
Gallwch wneud cynifer (neu gyn lleied) o'r ymarferion isod ag y dymunwch er mwyn cyrraedd y nod o ddylunio blodau.
Os bydd un cam yn peri anhawster i chi, edrychwch ar y cam nesaf - efallai bydd yn eich helpu i ddatrys y broblem.
Rydym hefyd wedi cynnwys sawl tasg estynedig ym mhob adran er mwyn herio rhaglenwyr mwy profiadol.
Ar gyfer y gweithdy hwn, byddwn yn defnyddio meddalwedd porwr, o'r enw Turtle Blocks. Mae'r feddalwedd yn rhad ac am ddim ac ni fydd angen ei lawrlwytho, ei gosod na mewngofnodi.
Meddalwedd yw 'Turtle Blocks' sy'n defnyddio blociau codio sylfaenol i yrru 'crwban' o amgylch y sgrin. Trwy ddefnyddio pen ysgrifennu, gall y crwban greu siapiau a phatrymau.
Yma, darparwyd ciplun o'r sgrin gyntaf gydag allwedd.
Os ydych yn ansicr ynghylch defnydd eicon neu'r blociau, gallwch hofran y llygoden uwch eu pennau i gael rhagor o wybodaeth.
Er mwyn tynnu rhywbeth mor gymhleth â blodyn gan ddefnyddio'r rhaglen hon, rhaid edrych yn gyntaf ar sut i dynnu llun gwahanol siapiau.
Beth yw sgwâr? - Mae sgwâr yn siâp a chanddo bedair ochr o'r un hyd a phedair cornel ongl sgwâr (90°).
Pan fyddwch yn llwytho prosiect newydd ar 'Turtle Blocks', byddwch hefyd yn cael bloc codio bychan. Edrychwch arno i weld a allwch ddyfalu llun pa siâp fydd yn cael ei dynnu cyn pwyso'r botwm chwarae.
Beth am inni gael golwg fwy manwl ar y rhaglen hon:
dechrau - Dyma'r bloc sy'n dal y rhaglennu sy'n cychwyn wrth inni glicio ar chwarae.
ailadrodd 4 - Mae'r llinell hon yn dweud wrth y rhaglen am ailadrodd y blociau codio tu mewn bedair gwaith.
Felly, mae'r rhaglen gyfan yn dweud wrth y crwban am deithio ymlaen 100 uned, troi 90° ac ailadrodd y weithred 3 gwaith eto - sy'n creu sgwâr.
1. Newidiwch y rhaglen i greu sgwâr o wahanol feintiau
2. Newidiwch y rhaglen er mwyn bod y crwban yng nghornel dde isaf y sgwâr (yn hytrach na'r chwith isaf fel y dangosir yn yr enghraifft uchod)
3. Ychwanegwch y blociau angenrheidiol i beri i'r crwban dynnu llun y ddwy sgwâr yn heriau 1 a 2 mewn un rhaglen
Rhowch gynnig ar ail-greu'r lluniau isod:
Ar gyfer o leiaf un o'r rhain; rhaid ichi ddefnyddio'r bloc 'pen i fyny' i ganiatáu symud heb dynnu llun, a'r bloc 'pen i lawr' i ddechrau tynnu llun eto.
I'ch herio ymhellach, rhowch gynnig ar ail-greu'r lliwiau hefyd (defnyddiwyd y gwerthoedd lliwiau sy'n ffactorau o 10)
Mae'n bosib cynhyrchu patrymau sgwariau yn 'Turtle Blocks' sy'n ffurfio edrychiad tebyg i flodyn, fel y dangosir isod:
Mae sgwariau yn siapiau syml i'w cynhyrchu, ond mae'n eithaf anodd i ddylunio blodau gyda nhw. Felly, beth am inni ddechrau datblygu ein gallu i greu siapiau eraill.
Edrychwn nawr ar sut y gallwn ni newid y rhaglen i dynnu llun pentagonau rheolaidd. Bydd ganddyn nhw bum ochr o'r un hyd a phum cornel cyfatebol.
Pa ongl sydd ei hangen ar gyfer pentagon? Fe wnawn ni rannu dull y gallwn ei ddefnyddio i ganfod yr onglau sy'n creu unrhyw siâp.
I gwblhau siâp, rhaid i'r crwban deithio cyfanswm o 360°
Mae hyn yn golygu mai'r ongl sydd ei hangen i dynnu llun pentagon rheolaidd yw:
\[360 ÷ 5 = 72°\] a gallwn hefyd ysgrifennu hyn fel \[{360 \over 5} = 72°\]
Bydd raid ichi ddechrau prosiect newydd i ddychwelyd i'r rhaglen tynnu llun sgwâr ragosodedig. Pa rifau fydd yn rhaid eu newid i beri iddi dynnu llun pentagon?
1. Lluniwch bentagon hanner maint yr un a luniwyd yn yr ateb uchod.
2. Sut byddem yn newid yr hyn rydym wedi'i wneud i greu hecsagon (siâp chwe ochr) neu octagon (siâp wyth ochr)?
Rhowch gynnig ar ailgynhyrchu'r pentagonau hyn:
Rydym wedi darparu enghreifftiau o sgwariau a phentagonau wedi'u tynnu trwy gylchdroi ar un gornel i gynhyrchu cynllun tebyg i flodyn yn yr adrannau blaenorol. Gellir gwneud hyn eto gydag unrhyw siâp:
Sut mae creu'r patrymau cylchdro hyn?
Gadewch inni ddangos i chi. Yn gyntaf, dyma'r rhaglen ar gyfer creu patrwm cylchdro gyda sgwariau:
A allwch chi adnabod yr adran yn y rhaglen uchod sy'n tynnu llun sgwâr?
Pa floc sy'n gorchymyn y rhaglen i greu pum sgwâr?
Pam mae gwerth yr ail floc troi i'r dde wedi'i osod i 72?
Pa bryd mae'r lliw yn newid yn ystod y patrwm?
dechrau - mae'n dweud wrth y rhaglen am redeg y blociau sydd wedi'u cynnwys wrth ddechrau
ailadrodd5 - mae'n gorchymyn y rhaglen i ailadrodd y blociau sydd wedi'u cynnwys 5 gwaith. Gan fod hynny'n cynnwys y cyfarwyddyd ar gyfer tynnu llun sgwâr, bydd llun 5 sgwâr yn cael eu tynnu
gosod lliw ar hap o leiaf 0 - mae'n dweud wrth y rhaglen am newid y lliw cyn tynnu llun pob sgwâr. Yn 'Turtle blocks', mae gan liwiau werth rhifiadol rhwng 0 a 100. Mae hynny'n peri i'r rhaglen ddewis gwerth ar hap, ac o leiaf 0 ar gyfer y lliw.
↓ar hap 100 ar y mwyaf - mae'r bloc llwyd yn gweithredu fel gwahanydd i wneud y cod yn fwy taclus, ac nid yw'n effeithio ar y rhaglen. Llenwir gweddill y llinell â'r gosodiad 100 fel gwerth uchaf y lliw y bydd y detholydd ar hap yn ei ddewis.
ailadrodd4 - dyma'r bloc ailadrodd sy'n tynnu llun un sgwâr trwy ailadrodd y cod tu mewn bedair gwaith, unwaith ar gyfer pob ochr.
ymlaen100 - mae'n tynnu llinell syth a'i hyd yn 100 uned
i'r dde90 - mae'n troi'r crwban 90° i'r dde (90° oherwydd y rheol fod yn rhaid i'r crwban deithio cyfanswm o 360° er mwyn cwblhau siâp - mae pedair cornel mewn sgwâr ac felly rhaid i bob tro fod yn 360 ÷ 4 = 90°)
i'r dde72 - mae'r cyfarwyddyd hwn yn dweud wrth y crwban am droi 72° arall i'r dde ar ôl pob sgwâr. Mae hyn oherwydd ein bod yn cynhyrchu cylchdro cyfan (360°) o amgylch pwynt wrth dynnu llun pum sgwâr â gofod hafal rhyngddynt. 360° ÷ 5 sgwâr = 72° rhwng pob un.
Gan ddefnyddio'r cod hwn, gwnewch y newidiadau angenrheidiol er mwyn ail-greu'r un patrwm gyda phentagonau, hecsagonau ac octagonau.
Nawr, crëwch yr un patrwm cylchdro gyda 10 hecsagon
Chwiliwch am y bloc rhannu rhifau a'i ddefnyddio i gynhyrchu pum heptagon (siapiau seithongl) yn gywir yn y patrwm cylchdro hwn:
Ymchwiliwch i greu newidynnau ar gyfer nifer yr ochrau a nifer y siapiau er mwyn ei gwneud hi'n haws i fewnbynnu'r newidiadau
Rhowch gynnig ar ail-greu'r isod:
A ninnau bellach wedi archwilio siapiau ag ochrau syth, beth am inni edrych ar greu cylchoedd.
Gan ddefnyddio'r hyn a ddysgwyd eisoes, lluniwch siâp 360-ochr rheolaidd (a elwir yn 360-gon neu yn dricosiahecsecontagon) gyda phob ochr yn 2 uned o hyd?
Sut olwg fydd arno?
Pam oedd yn rhaid lleihau hyd yr ochrau?
A yw'r un twyll llygaid yn digwydd ar gyfer siâp 300, 250 neu 200 ochr? Mae'n bosib y bydd yn rhaid ichi ymestyn hyd yr ochrau eto er mwyn ymchwilio.
Cynhyrchwch y cynllun hwn mewn lliwiau o'ch dewis:
Ailgrëwch y cynllun isod o ddeuddeg 360-gon:
Gan ddefnyddio newidynnau a blociau mathemateg, rhowch gynnig ar ail-greu'r cynllun lliwiau hefyd.
Mae 'Turtle Blocks' yn cynnig ffordd symlach i dynnu llun cylch trwy ddefnyddio un bloc codio:
Mae'r rhaglen hon yn dweud wrth y crwban am dynnu llun arc sy'n teithio 360° o amgylch cylch ac iddo radiws o 100 uned.
Os gwnawn ni gynyddu'r radiws, bydd y cylch yn tyfu'n fwy. Os gwnawn ni leihau'r ongl, tynnir llun llai o gylchedd y cylch.
Pam, yn eich barn chi, mae'r rhaglen yn rhedeg yn gynt na thynnu llun 360-gonau?
Ailgrëwch y patrwm isod (ceir pum cylch coch, deg gwyrdd a phymtheg glas):
Rhowch gynnig ar ail-greu'r isod:
Mae'r cyntaf o'r rhain yn ddatblygiad o'r ymarfer olaf uchod, lle mae hecsagonau wedi cymryd lle y cylchoedd gwyrdd, a sgwariau wedi cymryd lle y rhai glas.
Mae'r ail yn cynnwys defnyddio 'pen i fyny' a 'phen i lawr' i newid y man cychwyn ar gyfer pob cylch.
Mae'r trydydd yn gyfuniad o siapiau, symudiadau a defnydd o'r pen ysgrifennu - mae pob arc a ddefnyddir un ai yn 360° neu 180°.
Gellir defnyddio'r bloc arc yr oeddem yn ei ddefnyddio yng Nghylchoedd 2 i dynnu llun pob math o gromlinau.
Mae hyn yn ein galluogi i ffurfio siâp petal gan ddefnyddio'r rhaglen sylfaenol hon:
Gallwch newid y naill neu'r llall o werthoedd yr arc i addasu'r cromlin a maint y petal. Ond, pa bryd bynnag y byddwch yn newid yr ongl, rhaid ichi hefyd newid gwerth y gorchymyn troi i'r dde. Cyfrifir gwerth troi i'r dde gan ddefnyddio 180 − ongl yr arc
Felly, os newidiwch ongl yr arc i 45°, mae gwerth troi i'r dde yn newid i 180 − 45 = 135°.
Rhowch gynnig ar dynnu llun siâp petal gydag ongl arc o 67°.
Crëwch y patrwm isod gyda siâp petal o'ch dewis:
Ymarferwch osod y petalau yn haenau, fel y dangosir yma:
Gan ddefnyddio'r bloc 'storio', crëwch newidyn ar gyfer ongl arc eich petal a fydd yn eich galluogi i newid y gwerth hwn ac addasu'r ongl troi i'r dde yn gywir ar yr un pryd.
Allwch chi beri i'r siapiau petalau a ddefnyddiwyd amrywio ar hap? I wneud hyn, rhaid ichi ystyried ystod gwerthoedd ongl yr arc a'r radiws.
Ceisiwch weld a allwch chi greu cynhyrchydd blodau fydd yn cynhyrchu blodyn ar hap bob tro.
Hyderwn eich bod wedi manteisio ar y cyfle yn yr adrannau uchod i archwilio'r feddalwedd er mwyn eich bod yn gallu cyfuno eich holl wybodaeth i gynhyrchu amrywiaeth o flodau.
Eich tro chi nawr i arbrofi i weld pa flodau y gallwch chi eu creu a beth yw eich hoff ddull.
Ystyriwch ychwanegu cyffyrddiadau olaf fel coesynnau, dail neu beth am roi sawl blodyn mewn tusw.
Byddem yn hoffi gweld eich cynlluniau gorffenedig a'u rhannu i helpu i ysbrydoli eraill. Anfonwch eich ffeil 'Turtle Blocks' at nar25@aber.ac.uk
