Croeso i rifyn o Gyfres Darlithoedd Fideo Ysgol Fusnes Aberystwyth.
Mae'r darlithoedd hyn yn cyd-daro â'r Cwricwlwm Astudiaethau Busnes Safon Uwch ledled y Deyrnas Unedig.
Ymddiheuriadau mai dim yn Saesneg y maent ar gael ar hyn o bryd.
Mae Mr a Mrs Roberts yn berchen ar siop fara ar y stryd fawr mewn tref farchnad wledig. Torthau a rholiau maent yn eu gwerthu'n bennaf, ac mae'r rhain yn cael eu pobi'n ffres i bobl leol ac i dwristiaid. Maent hefyd yn cynhyrchu amrywiaeth o gacennau ac mae ganddynt enw da am gynhyrchu byns Chelsea o safon. Maent ar agor 6 diwrnod yr wythnos ac maent ar hyn o bryd yn cymryd oddeutu £600 y dydd. Mae eu costau'n codi ac nid ydynt am gynyddu'u prisiau. Maent yn chwilio am strategaeth farchnata i'w helpu nhw i werthu rhagor o'u cynnyrch. Eu nod yw sicrhau £1000 o refeniw bob dydd o fewn y 2 flynedd nesaf, ond nid ydynt yn siŵr sut mae cyflawni hyn. Maent yn fodlon rhoi cynnig ar ryseitiau newydd ac mae ganddynt ystafell fechan wrth ochr y siop fara sy'n wag ar hyn o bryd.
Rydych yn ymgynghorydd marchnata a fydd yn eu cynghori nhw ynglŷn â'r llwybr(au) gorau ar eu cyfer. Byddwch yn defnyddio matrics Ansoff i'ch helpu chi.
(Treiddio'r farchnad - cynhyrchion presennol i farchnadoedd presennol, ffactor risg 1)
(Datblygu Cynnyrch Newydd neu Gyflwyno Cynnyrch Newydd - cynhyrchion newydd i farchnadoedd presennol, ffactor risg 2)
(Datblygu'r Farchnad - cynhyrchion presennol i farchnadoedd newydd, ffactor risg 4)
(Arallgyfeirio - cynhyrchion newydd i farchnadoedd newydd - gall y rhain fod yn gynhyrchion/marchnadoedd sy'n gysylltiedig â'r hyn sy'n cael ei gynnig ar hyn o bryd, neu rai nad ydynt yn gysylltiedig â'r hyn sy'n cael ei gynnig ar hyn o bryd, ffactor risg 16)
Defnyddiwch y matrics i feddwl am un syniad ar gyfer pob maes yn y matrics (uchod), ac esboniwch sut y bydd eich syniadau chi yn helpu Mr a Mrs Roberts i gyrraedd eu nod.